英超今晚爆發世紀大戰，焦點所在自然係曼聯能否阻止阿仙奴達成五十場不敗紀錄。不過曼聯今仗原來有「貴人」相助，就係執法球證拉利，佢近年多次執法曼聯賽事，當中有六場竟然「恩賜」紅魔鬼七個 十二碼，曼聯有此「秘密武器」壓陣，唔通勝望真係可以大為提高？難怪有英國博彩公司開出曼聯獲判十二碼的賠率，熱到去二賠九！
兩支死敵今季聯賽首度碰頭，震撼球壇，英國「Sky TV」表示，今仗肯定是全個英超最高收視率賽事，當地酒吧亦準備大做生意。博彩公司當然亦生意暢旺，而球證拉利專益曼聯的情況，亦引起公眾談論。
雲佬正選 拉利錫住
不過拉利「恩賜」十二碼畀曼聯，係有一個先決條件——荷蘭射手雲尼斯達萊必須正選出場。事實上呢位球證相當旺雲佬，因為響拉利的執法下，雲佬腳風明顯較順，總計拉利近年執法曼聯的八場賽事中， 雲佬射入十一球之多，入球數字相當驚人。
有見及此，英國博彩公司Bet365開出曼聯獲判十二碼的賠率為２賠９，另外雲尼斯達萊取得入球的賠率亦熱得燙手，僅為10賠11。Bet365發言人表示：「雖然雲尼斯達萊錯失過十二碼，不過今仗大有機會補 番數呢！」
